ಭಾರತ ಮಹಿಳೆಯ ಸ್ತುತಿ- ೮ನೆ ಮಾರ್ಚ್, ೨೦೧೧, ಅಂತರಾಷ್ಟ್ರಿಯ ಮಹಿಳಾದಿನ

೮ನೆ ಮಾರ್ಚ್, ೨೦೧೧ ವರ್ಷದ ಅಂತರಾಷ್ಟ್ರಿಯ ಮಹಿಳಾದಿನದಂದು ರಚಿಸಿದ-
ಭಾರತ ಮಹಿಳೆಯ ಸ್ತುತಿ- ಡಾ ವಿ ಬಿ ಆರತಿ

ಭಾರತ ಮಹಿಳೆಯ ಸ್ತುತಿ
ಅದ್ವಿತೀಯಳು ನೀನು ಭಾರತದ ನೀರೆ |
ಚೆಲುವು ಗೆಲುವುಗಳಿಂದ ಮಿರಿಮಿರಿವ ತಾರೆ ||
ಪ್ರೇಮದಲಿ ನೇಮದಲಿ ಸಾಟಿ ನಿನಗಾರೆ? |
ಧರ್ಮ ಕರ್ಮಗಳರಿತು ನಡೆವೆ ನೀ ಚತುರೆ ||
ನಳಿನಳಿಪೆ ಸುಂದರಿಯೆ ತೊಟ್ಟು ನೀ ಸೀರೆ |
ಒಲವಿನಿಂ ಕಂದನನು ಗೊಳುವೆ ನೀ ಸೂರೆ ||
ಖಡ್ಗವನು ಹಿಡಿದೆ ನೀ ರಣದಲ್ಲಿ ಶೂರೆ |
ಲೇಖನಿಯಲೂ ನೋಡೆ ನಿನ್ನ ನುಡಿಧಾರೆ ||
ಕಷ್ಟಗಳ ಸಹಿಸಿರುವೆ ಕ್ಷಮೆಯ ಸಿರಿ ಧಾರೆ |
ನುಂಗಿ ನೋವನು ನಗುವೆ ಶಾಂತಿಯನು ಬೀರೆ ||
ಉದ್ಯೋಗ ವ್ಯಾಪಾರ ಸೇನೆಯಲು ವೀರೆ |
ಎಲ್ಲ ಕ್ಷೇತ್ರದಿ ಬೆಳಗಿ ನಿಂದಿರುವೆ ಪೋರೆ ||
ಸತ್ವದಲಿ ಲಕ್ಷ್ಮಿ ನೀ ವಾಣಿ ನೀ ಚತುರೆ |
ಶಕ್ತಿಯಲಿ ದುರ್ಗೆಯನು ತೋರು ನೀ ಬಾರೆ ||
ಮರೆಯದಿರು ನಿನ್ನಾಳ ಭಿತ್ತರವ ಗೌರೆ |
ಅರಳು ಪೂರ್ಣತೆಯಿಂದ ಹಿರಿಬೆಳಕ ಬೀರೆ ||
ಛಲದಿಂದ ಸಾಪಲ್ಯ ಶಿಖರಗಳನೇರೆ |
ಸೋಲಿಲ್ಲ ನಿನಗೆ ಮುನ್ನಡೆಯುತಿರು ಧೀರೆ ||
ವಿಶ್ವದಲಿ ಮಿನುಗು ನೀ ಹೇ ಭರತ ನೀರೆ |
ಶಾಂತ ಶಕ್ತಿಯೇ ಸತತ ಮಿನುಗುತಿರು ತಾರೆ ||